Sri Dakshinamurthy Ashtakam 2 (Vyasa Krutam) – श्री दक्षिणामूर्त्यष्टकम् (व्यास कृतम्)
श्रीव्यास उवाच ।
श्रीमद्गुरो निखिलवेदशिरोनिगूढ
ब्रह्मात्मबोध सुखसान्द्रतनो महात्मन् ।
श्रीकान्तवाक्पति मुखाखिलदेवसङ्घ
स्वात्मावबोधक परेश नमो नमस्ते ॥ १ ॥
सान्निध्यमात्रमुपलभ्यसमस्तमेत-
-दाभाति यस्य जगदत्र चराचरं च ।
चिन्मात्रतां निज कराङ्गुलि मुद्रया यः
स्वस्यानिशं वदति नाथ नमो नमस्ते ॥ २ ॥
जीवेश्वराद्यखिलमत्र विकारजातं
जातं यतः स्थितमनन्तसुखे च यस्मिन् ।
येनोपसंहृतमखण्डचिदेकशक्त्या
स्वाभिन्नयैव जगदीश नमो नमस्ते ॥ ३ ॥
यः स्वांशजीवसुखदुःखफलोपभोग-
-हेतोर्वपूंषि विविधानि च भौतिकानि ।
निर्माय तत्र विशता करणैः सहान्ते
जीवेन साक्ष्यमत एव नमो नमस्ते ॥ ४ ॥
हृत्पुण्डरीकगतचिन्मणिमात्मरूपं
यस्मिन् समर्पयति योगबलेन विद्वान् ।
यः पूर्णबोधसुखलक्षण एकरूप
आकाशवद्विभुरुमेश नमो नमस्ते ॥ ५ ॥
यन्मायया हरिहर द्रुहिणा बभूवुः
सृष्ट्यादिकारिण इमे जगतामधीशाः ।
यद्विद्ययैव परयात्रहि वश्यमाया
स्थैर्यं गता गुरुवरेश नमो नमस्ते ॥ ६ ॥
स्त्रीपुंनपुंसकसमाह्वय लिङ्गहीनो-
-ऽप्यास्तेत्रिलिङ्गक उमेशतया य एव ।
सत्यप्रबोध सुखरूपतया त्वरूप-
-वत्त्वे न च त्रिजगदीश नमो नमस्ते ॥ ७ ॥
जीवत्रयं भ्रमति वै यदविद्ययैव
संसारचक्र इह दुस्तर दुःखहेतौ ।
यद्विद्ययैव निजबोधरतं स्ववश्या
विद्यं च तद्भवति साम्ब नमो नमस्ते ॥ ७ ॥
इति श्रीव्यासकृत श्री दक्षिणामूर्त्यष्टकम् ।
